ထာဝရအရိပ်

 

ခက်ရွက်သိပ်သည်း

ပင်ကြီးညိုမောင်း၊ လောင်းရိပ်အေးမြ

အာဝါသမှ၊ ရိပ်သာတမျှ

တခဏဖြင့် အေးစေသည်။

မေတ္တာ ယိုဖိတ်

မိဘရိပ်သည်၊ ရွက်စိပ်ကိုင်းဖြာ

ပင်ရိပ်သာထက်၊ အေးမြလျက်တည့်

တသက်ဖူလှုံ၊ ခိုလှုံချမ်းမြေ့

တဘဝဖြင့် အေးစေသည်။

သစ်ရိပ်ဝါးရိပ်

မိဘရိပ်ထက်၊ သိပ်သည်း​ချမ်းမြေ့

ကြည်မွေ့ဘဝင်၊ ရင်မီးငြိမ်းအေး

သောကဝေးတိမ်း၊ ခပ်သိမ်းဒုက္ခ

ကင်းလွတ်ပသော၊ ဗုဒ္ဓညွှန်ကြား

တရားရိပ်မှာ၊ သံသရာမှ

နိဗ္ဗူတထိ၊ ထာဝရဖြင့် အေးစေသည်။

ခင်သူသူဝင်း

မြဝတီမဂ္ဂဇင်း၊ ၁၉၇၈ ခုနှစ်၊ နိုဝင်ဘာလ၊ အတွဲ ၂၇၊ အမှတ် ၁၊ နှာ-၉၅။