မေမေ့ရင်ခွင်

 

မေမေရဲ့ ရွှေရင်ခွင်

စာသင်ကျောင်း ဆိုပါတော့၊

သားလုလင် စာအံကျက်လို့

တေးဆက်သည်ပေါ့။

 

မေမေရဲ့ ရွှေရင်ခွင်

ပန်းဥယျာဉ် ဆိုပါတော့၊

မေ့သားမောင် ပျော်ပျော်ပါး

ကစားလို့ဆော့။

 

မေမေရဲ့ ရွှေရင်ခွင်

သားခိုဝင် မှေးမှိတ်တော့၊

သားမောင်ကို နို့ချိုမွှေး

ပေးခဲ့တယ်နော့။

 

မေမေရဲ့ ရွှေရင်ခွင်

ပုခက်ယာဉ် ဆိုပါတော့၊

မေ့တေးချို ပုံပြင်ရိပ်မှာ

သားအိပ်ခဲ့ပေါ့။

 

မေမေရဲ့ ရွှေရင်ခွင်

ပျော်ရွှင်ဖွယ် အပြည့်၊

မေ့မျက်ခြယ် ခိုလှုံမွေ့

ချမ်းမြေ့ ပီတိ။

မောင်ရတနာ

မြဝတီမဂ္ဂဇင်း၊ ၁၉၈၁ ခုနှစ်၊ ဇူလိုင်လ၊ အတွဲ ၂၉၊ အမှတ် ၉။